Plantun de Prouvènço

Pèr coumpara dos planto d'encò nostre

Apium graveolens & Aloina ambigua

Àpi-sóuvage

Apium graveolens

Apiaceae Umbelliferae

Autre noum : Àpi.

Noms en français : Ache, Céleri.

Descripcioun :
L'àpi-sóuvage que se rescontro dins li palun e li relarg bagna proche de mar (var. graveolens), èi quàsi la memo planto qu'aquesto cultivado dins nòstis ort (var. dulce). Se recounèis à si fueioun un cop divisa generalamen en sèt gros fueioun e à si brout (oumbello) sènso bratèio. Coumpara pamens emé la berlo-bastardo di proun coumuno e la berlo que trachisson dins li mémi relarg e ié sèmblon un pau (manjadisso tambèn).

Usanço :
L'àpi es uno planto bèn couneigudo au nostre e s'adoubo d'un mant un biais (crus e cue). Li grano tambèn soun un bon sabourun. Èi couneigu pèr èstre uno planto diuretico, depurativo, estoumatico e carminativo. Se saup bessai mens que proun toucado emé li man, pòu douna, au soulèu, de problèmo de pèu (foutousensibilisanto).

Port : Erbo
Taio : 0,3 à 0,8 m
Fueio : coumpausado
Tipe bioulougico : Idroufite
Cicle bioulougico : Planto renadivo

Gènre : Apium
Famiho : Apiaceae
Famiho classico : Umbelliferae

Ordre : Apiales

Coulour de la flour : Blanco
Petalo : 5
Ø (o loungour) enflourejado : 2 à 3 cm
Flourido : Printèms - Estiéu

Sòu : Ca
Autour basso e auto : 0 à 100 m
Aparado : Noun
Mai à setèmbre

Liò : Palun sala - Sourgènt sala - Ribiero
Estànci : Mesoumediterran
Couroulougi : Paleoutemperado
Ref. sc. : Apium graveolens L., 1753

Alouessoun-à-double-entèndre

Aloina ambigua

Pottiaceae

Nom en français : Alouine ambigüe.

Descripcioun :
Aquelo mousso coumuno trachis en gazoun dense verd o un pau jauno. Se recounèis à si fueio espesso, en lanço, emé lou bout redoun (cucula). Fai souvènt d'espouroufite bèn que siegue diouïco e alor acò douno uno coulour pu bruno e rouginello au gazoun. Trachis sus li sòu argielous e sablous souvènt proche d'oustau.

Usanço :
Es proche d'àutri meno dóu meme gènre. Se destrìo de Aloina aloides que trachis dins li mémi relarg, pamens se n'en destrìo bonodi la membrano dóu peristome que sort de l'urno (se vèi pas pèr A. aloides), e peréu emé soun bout de fueio redoun (pounchu pèr A. aloides) e sis espouroufite mai dre (clina pèr A. aloides).